कान्तिपुर राष्ट्रिय दैनिक, २०६७ माघ ७

काठमाडौ, माघ ६ - विश्लेषक र राजनीतिज्ञहरूले दलहरूबीच बढेको असमझदारीका कारण चरम अविश्वास स्थिति उत्पन्न हु“दा शान्ति स्थापना, संविधानका साथै सरकार निर्माणमा समस्या देखिएको धारणा राखेका छन् । 'राजनीतिशास्त्र विद्यार्थी संघ'ले राजधानीमा गरेको 'शान्ति र संविधानः चुनौती र सम्भावना' सम्बन्धी अन्तक्रिर्यामा विश्लेषक र राजनीतिज्ञहरूले दलहरूबीच बढेको असमझदारी र अविश्वासका कारण सम्पुर्ण उपलब्धि नै विफल हुन सक्ने चेतावनी दिए ।

कार्यक्रममा माओवादी नेता वर्षान पुनले आर्थिक, सामाजिक र राजनीतिक हिसाबले रूपान्तरण गर्न सकिए मात्रै द्वन्द्व समाधान हुने टिप्पणी गर्दै ती क्षेत्रका विषयमा सम्झौता गर्न सके संविधान बन्ने धारणा राखे ।

कांग्रेस नेता रामशरण महतले दलीय मुद्दालाई संविधानमा राख्न खोजिए समस्या जटिल बन्न सक्ने भन्दै ५/६ वटाभन्दा बढी प्रदेश बनाइए जातीय युद्धका साथै भेदभावको स्थिति सिर्जना हुने धारणा राखे । एमाले महासचिव इश्वर पोख्रेलले सबै दलमा अतिवादीहरू सल्बलाउन थालेको उल्लेख गर्दै तिनलाई नियन्त्रण गरे र सहमतिका साथ अगाडि बढ्नुपर्ने बताए ।

कार्यक्रममा कान्तिपुरका सम्पादक सुधीर शर्माले पेस गरेको अवधारणापत्रमाथि टिप्पणी गर्दै कानुनविद् भीमार्जुन आचार्य र पत्रकार कनकमणि दीक्षितले आफ्ना धारणा राखेका थिए ।

Click here to view on Kantipur National Daily